پێویستە ئاوات عەلی ئازاد بکرێت بانگەواز بۆ رۆژنامەنووسان و چالاکانی مەدەنی و رێکخراوەکانی کۆمەڵی مەدەنی..

 

ئەمڕۆ 2017/6/4 دادگای لێکۆڵینەوەی کەلار پاش چواردە رۆژ لەزیندانی کردن، رۆژنامەنووس ئارام بەختیار پەیامنێری کەناڵی nrt ئازاد کرد، بەڵام لەهەمان کاتداو لەسەر هەمان دۆسییە ئاوات عەلی بەڕێوەبەری کەناڵەکەی بۆ ماوەی چوار رۆژ دەست بەسەرکرد. نووسینگەی گەرمیانی سەندیکای رۆژنامەنووسانی کوردستان هەر لەیەکەم رۆژەوە لەنزیکەوە چاودێری دۆسییەکەی کردووەو سکرتێری نووسینگەش رۆژانە لەگەڵ هەردوو رۆژنامەنووسی سکاڵالێکراو لەدادگاو لەکاتی وەرگرتنی وتەی هەردووکیانیشدا ئامادەیی هەبووە. پێشتر رامانگەیاندبوو کە هێشتنەوەی ئارام بەختیار بۆ ماوەی چواردە رۆژ لەزیندان، پێچەوانەی یاسای کاری رۆژنامەنووسی و بڕیارەکانی ئەنجوومەنی دادوەری هەرێمە، ئێستاش دووپاتی دەکەینەوە دەست بەسەرکردنی ئاوات عەلی بەڕێوەبەری کەناڵی nrt بەهەمان شێوە پێشێلکردنی یاسای کاری رۆژنامەواگەرییەو دەبوو هەر ئەمڕۆ ئازاد بکرێت. ئێمە لەسەندیکای رۆژنامەنووسانی کوردستان سەرەڕای ئەوەی داوا دەکەین هەرچی زووترە ئاوات عەلی ئازاد بکرێت، لەهەمان کاتدا ئەم جۆرە رێکارانەی کە بەناوی یاساوە بەرامبەر رۆژنامەنووسان دەگیرێتەبەر، بەهەولێک دەزانین بۆ بەرتەسک کردنەوەی ئازادی کاری رۆژنامەگەریی. لێرەشەوە داوا لەسەرجەم رۆژنامەنووسان و چالاکانی مەدەنی و رێخکراوەکانی کۆمەڵی مەدەنی و تەواوی خەمخۆرانی ئازادی رۆژنامەگەریی دەکەین، هاودەنگمان بن لەپاراستنی مافی رۆژنامەنووسان و هەر یەکەو لای خۆیەوە بەشێوازی جۆراوجۆر فشار درووست بکات بۆ ئازادکردنی رۆژنامەنووس ئاوات عەلی و رێگرتن لەدووبارە بوونەوەی ئەم جۆرە کارانەی بەرامبەر رۆژنامەنووسان و کەناڵەکانی راگەیاندن دەکرێت.

نووسینگەی گەرمیانی سەندیکای رۆژنامەنووسانی کوردستان

2017/6/4